Қазақстандағы сөз бостандығының бұзылуы 2023 жылғы 2-9 ақпан аралығы

2 ақпан 

Журналистер мен құқық қорғаушылар АҚДМ ұсынған «Масс-медиа туралы» Заң жобасына қарсы шықты

2 ақпанда Ақпарат және қоғамдық даму министрлігі «Масс-медиа туралы» ҚР Заңының жобасын ашық талқылауға ұсынды. 

Жобаны талқылаған жұмыс тобының мүшелері, журналистер, құқық қорғаушылар, сарапшылар, заңгерлер заң жобасы қазіргі түрінде қабылданса сөз бостандығы мен журналистің қызметін айтарлықтай шектейді дейді.

Алматыда өткен баспасөз мәслихатында «Әділ сөз» қорының президенті Карла Жаманқұлова: «Үкімет Президенттің тапсырмасын қабылдамаған сияқты. Қазіргі заң жобасының ешбір тармағы президенттің қойған міндеттеріне сәйкес келмейді. Ал мына шарттар, мысалы, журналист мәтінді шенеунікпен келісуі керек. Бұл қандай бақылау, цензура?», - деді.
Талқылауға ұсынылған заң жобасында жұмыс тобының отырысында талқыланбаған нормалар бар.

«Правовой Медиацентр» ҚҚ жетекшісі Диана Окремова Астанада өткен баспасөз мәслихатында: «Бір апта бұрын пайда болған заң жобасының мәтіні біз күтпеген жағдай. Жұмыс тобымен келісілмеген мәтін. Министрлік ешкім білмейтін кейбір жаңалықтарды қамтитын мәтінмен келгенін жұмыс тобына ескерткен жоқ. Ал тұжырымдаманы ведомствоаралық комиссия мақұлдап қойған. Бұл біздің қызметіміздің министрлік үшін мүлдем маңызды емес екендігінің белгісі», - деді.

«Масс-медиа туралы» Заң жобасында мәлімделген және жұмыс тобының мүшелері талап еткен талап қою мерзімін енгізу туралы норма талқылауға ұсынылған құжатта қамтылмаған.
Заң жобасы қолданыстағы «Бұқаралық ақпарат құралдары туралы» және «Телерадио хабарларын тарату туралы» екі заңның жиынтығынан жазылған. Журналистер мен құқық қорғаушылар ҚР Президентіне Үндеу жолдап, бәсекеге қабілетті және еркін БАҚ құру идеясына нұқсан келтіретін Үкіметтің іс-әрекетін ерекше бақылауға алуды сұрады.
 

8 ақпан

Серікжан Мәулетбай, BES.Media.kz (Алматы)

Журналист округтік сайлау комиссиясы төрағасын сотқа берді

BES.Media журналисі Серікжан Мәулетбай Алматы қаласының N5 сайлау комиссиясының төрағасы Болатжан Бозымбаевтың әрекетін заңсыз деп тануды талап етіп, Алматының мамандандырылған ауданаралық әкімшілік сотына шағым түсірді.
31 қаңтарда журналист редакцияның тапсырмасымен округтік сайлау комиссиясының отырысына қатысты. Онда төрт кандидаттың қойылатын талаптарға сәйкестігі қаралды.

Отырыс аяқталғаннан кейін Серікжан «ҚР-дағы сайлау туралы» ҚР Конституциялық Заңының 20-бабы 6-тармағына «Сайлау комиссиялары барлық тұлғалардың шешімдермен еркін танысуы үшін жағдай жасайды, олар жалпыға қолжетімді телекоммуникациялық желілерде орналастырылады, ал осы Конституциялық заңда көзделген жағдайларда өзге де жариялауға жатады» сілтеме жасап, ОСК шешімімен таныстыруды сұрады.

Округтік сайлау комиссиясының төрағасы журналисті өз шешімімен таныстырудан бас тартып: «Кез келген адам таныса алмайды. «Барлық тұлғалар» кім өтініш бергенін білдіреді және менің оларға хабарлауға құқығым бар. Бізде 16 адам бар, барлығын таныстырамын. Бұл сырттан келгендердің танысуға құқығы бар дегенді білдірмейді» деп түсіндірді.
Мәулетбай сайлау комиссиясының шешіміне еркін қол жеткізуден бас тартуды заңсыз деп тануды, АСК төрағасының шешімімен барлық адамдардың еркін танысуы, оларды жалпыға ортақ пайдаланылатын Алматы әкімдігінің сайтында

«Сайлау» арнайы бөлімінде, телекоммуникация желілерінде орналастыру үшін жағдай жасауды міндеттеуді талап етті.
7 ақпанда сотта алдын ала тыңдау өтті, оның қорытындысын жариялауды сот келесі күнге қалдырды.
8 ақпанда барлық тараптар, соның ішінде прокурор да онлайн процеске қосылды, бірақ судья 30 минут бойы экранға шықпады.

BES.media сайтының бас редакторы Серікжан Мәулетбай: «Судья Нұрбол Сейлов өз шешімін жариялағаны белгілі болды. Алайда, ол мұны қай жерде және қашан жасағанын білмейміз. Прокурор да, жауапкер де, талапкер де судьяны естімеді, көрмеді. 30 минут бойы Zoom бағдарламасында күттік. Хатшы ештеңе түсіндіре алмады», – дейді.
BES.media судьяның қандай шешім қабылдағанын Алматы қалалық сотының баспасөз хабарламасынан білді. Судья редакция сотқа дейінгі реттеу тәртібін бұзды және N5 округтік сайлау комиссиясының әрекеттеріне аумақтық сайлау комиссиясында шағымданбады деп шешті, сондықтан ол талап арызды қабылдаудан бас тартқан.

9 ақпан

БАҚ (Қазақстан)

АҚДМ сайлауды қалай жазу керектігін журналистердің есіне салды

Ақпарат және қоғамдық даму министрлігі ҚР бұқаралық ақпарат құралдарына Парламент Мәжілісі депутаттарының кезектен тыс сайлауы туралы ақпараттық хабарлама жариялады.
АҚДМ БАҚ, интернет-ресурстар мен онлайн-платформа пайдаланушыларының назарын 2022 жылғы 5 қарашада енгізілген «Қазақстан Республикасындағы сайлау туралы» Конституциялық Заңның (бұдан әрі – заң) новеллаларына аударады.

Атап айтқанда:

• Парламент Мәжілісінің депутаттары аралас сайлау жүйесі бойынша сайланады;
• БАҚ-та және әлеуметтік желілердегі (онлайн-платформалар) онлайн-платформаларды пайдаланушылардың сайлауалды үгіт-насихат жұмыстарын жүргізу тәртібі белгіленді.

Әлеуметтік желіде (онлайн-платформаларда) сайлауалды үгіт-насихат жүргізуге ниет білдірген онлайн-платформаларды пайдаланушылар БАҚ-пен бір деңгейде төлем мөлшері, үгіт материалдарын орналастыру шарттары туралы ақпаратты жариялауы және оларды 5 күн бұрын ұсынуы қажет.

Егер БАҚ үгіт материалдарын өзінің ресми аккаунтында, әлеуметтік желіде (онлайн-платформаларда) орналастыруды жоспарласа, онда олар тиісті сайлау комиссияларына аккаунттардың атауларын ұсынуы тиіс.
Үгіт материалдарын дербес беттерінде орналастыру шарттары туралы мәліметтерді ОСК және/немесе АСК-ке жариялаған және ұсынған БАҚ пен онлайн-платформаларды пайдаланушылар үгіт материалдарын тек шарттық негізде орналастырады.
АҚДМ хабарламасында, азаматтар мен қоғамдық бірлестіктердің қаржыландыруды талап етпейтін сайлау алдындағы кедергісіз үгіт жүргізу құқығы сақталады, делінген.

Үгіт материалдарын орналастыру шарттары туралы ақпаратты ОСК және/немесе АСК-ға бермеген бұқаралық ақпарат құралдары кандидаттың үгіт материалдарын орналастыру және тарату үшін эфир уақытын, баспасөз бетін бере алмайды.
Сондай-ақ министрлік телеарналар мен радиоарналарда ақпараттық-сараптамалық бағдарламаларда кез келген үгіт материалдарын таратуға тыйым салынғанын еске салды.
Министрлік сайлау заңнамасын бұзғаны үшін әкімшілік жауапкершілікке тартылатынын еске салады.
 

3 ақпан

«Ақ Жайық» (Атырау)

«Ақ Жайық» редакциясына Роскомнадзордан тағы екі хабарлама келді

2022 жылдың тамыз айынан бастап қазіргі уақытқа дейін «Ақ Жайық» редакциясына Роскомнадзордан «Домендік атаулардың бірыңғай реестріне кіру, Интернеттегі сайттардың беттеріне нұсқағыштар және Ресей Федерациясында таратуға тыйым салынған ақпаратты, Интернеттегі сайттарды анықтауға мүмкіндік беретін желілік мекенжайлар туралы» бес хабарлама келіп түсті. Мұндай хабарлама 2023 жылы 2 және 3 ақпанда келді.

Роскомнадзор хостинг провайдері мен сайт иесінен Украинадағы әскери қақтығыс туралы бес мақаланы жоюды талап етеді.
«Егер хостинг провайдері және (немесе) сайт иесі тыйым салынған ақпаратты жою және (немесе) «Интернет» желісіндегі сайтқа кіруді шектеу жөнінде шараларды қабылдамаған жағдайда, Ресей Федерациясында таратуға тыйым салынған ақпаратты қамтитын «Интернет» желісіндегі сайтты сәйкестендіруге мүмкіндік беретін желілік мекен-жайдың бірыңғай реестріне енгізу туралы шешім қабылданатын болады және оған қол жеткізу шектеулі болады», - деп хабарлайды Роскомнадзор.
Редакция мақалаларды өшіруден бас тартты.

5 ақпан

Динара Егеубаева, DINARION (Алматы)

Журналист Динара Егеубаеваның ұлына пистолетпен шабуыл жасалды

5 ақпанда DINARION YouTube арнасының авторы әрі жүргізушісі Динара Егеубаева «ЕО азаматы» ұлы Әдиге қарумен шабуыл жасалғанын хабарлады.

Шабуыл кешкі сағат 22:00 шамасында Әди үйінен шығып дүкенге бара жатқанда болған.
Динара Егеубаева КМБПЧ өткізген баспасөз мәслихатында: «Жолда менің ұлым досымен телефон арқылы сөйлесіп, орындыққа отырады. Осы сәтте ұялы телефонмен қатты сөйлескен жас жігітті көреді. Ұлым орнынан тұрып, дүкенге қарай бет алғанда жігіт оған: «Бауырым!» дейді. Әди бұрылғанда, бетін капюшонмен жауып алған, тек көздері ғана көрінген жас жігітті көреді» - дейді.

Журналистің айтуынша, жігіт бір қолында пистолет ұстап, оны Әдиге бағыттап телефонды өшіруді бұйырған.
«Шамасы, ұлымның өзін-өзі қорғау инстинкті жұмыс істеді: қолын төмен түсіріп, ол жүгіре жөнелген. Жігіт оны қумаған, тек айқайлап: «уайымдама, бұл шын емес!» деген. Әди үйге жүгіріп келіп, маған қоңырау шалды», - дейді Егеубаева.
Журналист болған оқиғаны қысым ретінде қарастырады. Орын алған жағдайды өзінің кәсіби және саяси қызметімен байланыстырады.

Алматы полиция департаментінің баспасөз қызметі бұл оқиға тергеліп жатқанын хабарлады.
6 ақпанда полиция департаментінің баспасөз қызметі: «Бұл факт тіркелді. Істің мән-жайын анықтауға бағытталған іс-шаралар жүргізілуде. Істі Тергеу басқармасы жүргізіп жатыр», - деп хабарлады.

6 ақпан

«Наша Газета» (Қостанай)

Қостанайлық БАҚ редакцияларына белгісіз біреулер «мина» қойып кеткен

Ақпанның 6-сы күні «Наша Газета» апталығының редакциясына полиция қызметкерлері келіп, журналистер жұмыс істейтін бөлмелерді тексеру керектігін айтты. Себеп – ng@ng.kz электронды поштасына «МАҢЫЗДЫ» деген белгі қойылған жарылғыш зат орнатылғаны туралы қауіпке толы хат келген.
«НГ» бас редакторы Тимур Гафуровқа Қостанай облысы ПД экстремизмге қарсы іс-қимыл басқармасының қызметкері Амангелді Бапинов түсіндіргендей, мұндай хаттар басқа қостанайлық БАҚ редакцияларға да келген. Әр редакцияда полиция қызметкерлері қазір миноискатор және иттің көмегімен барлық бөлмелерді қарап жатыр. Жарылғыш құрылғы табылған жоқ.

7 ақпан

Arbat.media (Алматы)

ҚР СІМ Arbat.media-ның ресейлік сотқа шақырылуына назар аударды

Қаңтардың соңында қазақстандық Arbat.media басылымы 17 ақпанда Ресейдің Владимир қаласының Ленин аудандық сотына келуді талап еткен сот хабарламасын алды. Ресей армиясының 19-шы әскери прокуратурасы 2022 жылдың қыркүйегінде жарияланған «Российские оккупанты терпят поражение в Харьковской области, но не хотят этого признавать» деген мақалаға байланысты басылымды сотқа берді.

Arbat.media Қазақстанның Сыртқы істер министрлігі басылымның ресейлік сотқа шақырылуына назар аударды, деп хабарлайды.
ҚР СІМ бұл жағдайда Ресей соты Ресей Федерациясының Азаматтық іс жүргізу заңнамасының талаптарына сүйенді деп санайды.

Демек, Ресей Федерациясының аумағында белгілі бір жаңалықтар ресурсын бұғаттау үшін қабылдаған шаралар Ресейдің ішкі заңнамасына негізделген. Басқаша айтқанда, оның шешімдерінің заңды күші жоқ және Қазақстан Республикасының аумағында қолданылмайды, - деді СІМ.
Министрліктің жауабында: Қазақстан мен Ресей арасында тараптардың аумағында БАҚ қызметіне сыртқы араласу мүмкіндігін көздейтін шарттар жоқ.

Arbat.media министрліктің жауабын: «Халықаралық құқық нормалары әркімнің өз пікірін еркін білдіруге құқығы бар екенін айтады; ұлттық заңнамада көзделген бұл құқыққа мемлекеттік шекараларға қарамастан, ауызша, жазбаша немесе баспасөз немесе көркемдік формалар арқылы немесе өз таңдауы бойынша, бірақ мемлекет шектеулі ақпаратты қабылдау мүмкіндігімен кез-келген ақпарат пен идеяларды іздеу, алу және тарату еркіндігі кіреді» - деп келтіреді.

8 ақпан

Самал Ибраева, Ulysmedia.kz (Астана)

Ulysmedia редакциясына малдың өкпе-бауыры мен бас редактордың балаларының суреті жеткізілді

Ақпанның 8-і күні таңертең Ulysmedia.kz редакциясына курьерлік қызмет бір қорап әкелді. Онда бас редактор Самал Ибраеваның отбасылық суреті мен малдың өкпе-бауыры болған.
Самал Facebook парақшасында: «Қандай да бір қорқынышты кибершабуыл емес, мағынасы бар қарапайым сыйлық», - деп жазды.

Шақырылған полиция қызметкерлері Самал Ибраевадан түсінік (арыз) пен контейнерден саусақ іздерін алды.
BES.Media полицияның хабарламасында: «Ulysmedia.kz ғимаратында белгісіз жануардың ішкі мүшелері салынған контейнер және отбасылық фотосуреттердің көшірмелері Астана қаласы «Есіл» ауданының полиция басқармасында тіркелді. Қажетті сараптамалар тағайындалды, тергеу жүргізілуде», - деп келтіреді.

Самал Ибраева болған оқиғаны «редакцияны қорқыту әрекеті» деп санайды.
Самал: «Бұл қаскүнемдер неге қол жеткізгісі келетінін түсіндірмейді, президент пен полициядан қорықпайды. (...) Не қалайды? Қорқытқысы келеді ме? БАҚ-ты жабуға мәжбүрлегісі келеді ме? Мүмкін бұл сұраққа біреу жауап берер, бірақ қашан? Бізде сайлау кезеңі, жұмыс көп, мен мұнда полицейлермен біргемін, олар да менен кімге не керек екенін түсінбейтіндерін жасырмайды...», - дейді.
9 ақпанда Қасым-Жомарт Тоқаев Ішкі істер министрі Марат Ахметжановты қабылдап, азаматтық қоғам өкілдері мен журналистерге бағытталған заңсыз әрекеттер мен арандатушылықтарды ашу жөніндегі жұмысты жандандыруды тапсырды.
 

3 ақпан

БАҚ (Қазақстан)

Адвокат журналистерді сот процесін объективті түрде жазуға шақырды

Блогер Мейіржан Төребаевтың адвокаты Жанна Оразбақова әлеуметтік желіде Mudarabah Capital қаржы пирамидасына қатысты істің барысын жариялап жатқан БАҚ өкілдерін объективті болуға шақырды.
Оның айтуынша, қазір 12 адам айыпталып отыр. 9 қаңтарда прокурор айыптау актісін жариялады. Онда пирамиданы кім құрғаны және кім ұйымдастырушы болғанын нақты көрсеткен, ал оның қорғалушысы Мейірхан Төребаев бұл тізімде жоқ.
 «Журналистер ұйымдастырушының фамилиясын жақсы естіді! Неге барлық жерде тек Төребаевтың аты аталады? Басылымның рейтингін көтерудің тағы бір әрекеті ме? Объективтілік қайда? Этика қайда? Төребаевтың суретін өз коллаждарыңызда қолдана отырып, қоғамдық пікір қалыптастырасыз», - деп жазды Оразбақова.

3 ақпан

Адвокат кінәсіздік презумпциясын журналистердің есіне салды

БАҚ-қа жолдаған Үндеуінде адвокат Анар Құсайынова сот үкімі заңды күшіне енгенге дейін «Ұрланған 1,3 млрд.теңге...» деген сөздермен мақалаға жол берілмейтінін айтты.
Адвокат Facebook-те «Кликбейт мазмұнды бергенде бұқаралық ақпарат құралдары кінәсіздік презумпциясы принципін ұмытып, журналист әріптестеріңізді ұстағанда, тұтқындағанда, үйінде, пәтерінде тінту жүргізгенде, заңсыз үкім шығарғанда ғана еске түсіретіні өкінішті! Өздеріңізден бастаңыздар, журналист мырзалар!» деп жазды.

6 ақпан

Олеся Вертинская, «Дорожный контроль» (Атырау қ.)

Атырау облысының санэпидбақылау департаменті «Дорожный контроль» тілшісін сотқа берді

Атырау қалалық соты Атырау облысы санитарлық-эпидемиологиялық бақылау департаментінің ар-намысын, қадір-қасиетін және іскерлік беделін қорғау туралы «Дорожный контроль» тілшісі Олеся Вертинскаяның үстінен талап арызын қабылдады.
Талапкер 2022 жылдың 4 қазанында YouTube желісіндегі «ДГК.Регион 06» арнасында «Г Атырау Позор СЭС» атты репортажда таратылған ақпаратты шындыққа жанаспайтын, ар-намыс пен қадір-қасиетке нұқсан келтіретін ақпарат деп тануды, жауапкерді жазбаша түрде теріске шығаруды міндеттеуді және «ДГК.Регион 06» арнасында халыққа үндеу жариялап, бейнематериалды бейнехостинг платформасынан алып тастауды талап етеді.
Түсіру тобы өз репортажында мемлекеттік мекемелердің республиканың мемлекеттік рәміздерін орналастыру ережелерін сақтауы туралы айтты.

7 ақпан 

Айжан Әуелбекова, «Время» (Тараз қ.)
Галина Скрипник, журналист (Тараз қ.)
Жанна Мамашева, белсенді (Тараз қ.)

Таразда сот «Время» газетінің тілшісіне талап қоюдан бас тартты

7 ақпанда Жамбыл облысы Тараз қалалық соты азамат Д-ның «Время» газетінің тілшісі Айжан Әуелбековаға, журналист Галина Скрипникке және белсенді Жанна Мамашеваға қарсы ар-намысын, қадір-қасиетін және іскерлік беделін қорғау туралы талап арызы бойынша шешім шығарды. 

Айжан Әуелбекованың адвокаты: «талапкер менің клиентімді арандатып, оның талапкерге ешқандай қатысы жоқ мақаласын таратты. Айта кету керек, журналист талапкер туралы, әсіресе оның іскерлік беделіне нұқсан келтіретін ешқандай мәлімет жарияламады. Талапкердің журналист атына арандатушылық әрекеттерінің тоқтамауына байланысты менің клиентім уәкілетті органдарға жүгінді» деп хабарлады.
Бұл мәлімдеме сотқа жүгінуге негіз болды.

Талапкер арыздағы мәліметтерді беделге нұқсан келтіретін және шындыққа жанаспайды деп тану, жауапкерлерден оны теріске шығаруды міндеттеуді және моральдық зиян үшін 900 000 теңге өндіруді талап етті.
Сот талапты қанағаттандырусыз қалдырды. Шешім заңды күшіне енген жоқ. Шығарылған күннен бастап бір ай ішінде шағымдануға болады.

7 ақпан

Серік Қожаниязов, «ДГК.Регион.06» (Атырау)

Атырауда тәртіп сақшысы «Дорожный контроль» тілшісінің үстінен полицияға шағымданды

Атырауда құқық қорғау органының қызметкері Ерлан Биғамбаев Атырау қалалық ІІБ-не белсенді, «Дорожный контроль» тілшісі, Серік Қожаниязовқа қатысты жала жабу фактісі бойынша тиісті шара қолдануды сұрап арызданған. 
2022 жылдың қаңтарында Қожаниязов сыбайлас жемқорлыққа қарсы іс-қимыл департаментіне ұлын (ол кезде 17 жаста) полиция бөлімінде ұрып-соғу туралы арыз берген. Іс бастапқыда «Азаптау» бабы бойынша қозғалды, содан кейін «лауазымын теріс пайдалану» бойынша ауыстырылды, ал жылдың соңында қылмыстық құқық бұзушылық құрамының болмауына байланысты жабылған. Ақпан айының басында облыс прокуратурасы қылмыстық істі тоқтату туралы қаулының күшін жойды.

Арызданушы: «Осы жылдың 6 ақпанында С.Қожаниязов YouTube желісіндегі «DGK.Region.06» арнасында оған ақша ұсынды деп жала жапқан ақпарат таратып, қызметкерлердің үстінен арызды қайтарып алуды және оларды ұстамауды жауапқа тартпауды өтінген» деп мәлімдейді.

9 ақпан 

Махамбет Әбжанның жабық қылмыстық ісіндегі құжаттар еркін қол жетімді болды

3 ақпанда ABZHAN NEWS Telegram арнасының негізін қалаушы және авторы Махамбет Абжан 9 жылға бас бостандығынан айырылды. Журналистің ісі жабық режимде қаралды. Судья жәбірленуші – кәсіпкер Р. Махат тарапының өтінішін қанағаттандырып, өз шешімін Абжанның Telegram-каналының 11,5 мыңнан астам жазылушысы болғандықтан, сот залында кәсіпкерге қатысты мәліметтерді жария ету оның қауіпсіздігіне қауіп төндіруі мүмкін деп негіздеді.
Сот үкімі жария етілді. Судья қарар бөлігін оқыды.

Ал, ақпанның 8-інен 9-на қараған түні кез келген адам Жоғарғы соттың сайтынан журналиске қатысты үкімнің толық мәтінін жүктей алды. Бұл туралы Махамбет Әбжанның адвокаты Төлеген Шайықов айтты.
Шайықов әлеуметтік желіде: «Махамбет Әбжанның қылмыстық ісінің материалдарын алдымен тергеу кезінде Антикор жариялады, соттан кейін соттың өзі, соттың баспасөз релизі болған кезде оның кінәсі дәлелденген (бұл күшіне енген үкімге қатысты емес), содан кейін тағы да антикор (әңгіме жазбасын жариялады), енді Астананың қылмыстық соты қылмыстық істің барлық материалдарын сот кабинетінде жариялады. Іс түні бойы көпшілікке қол жетімді болды. Бұл журналистиканың «жүктеу түні» болды. Бірақ, әрине, адвокаттар үшін іс «жабық». Біз түсініктеме мен баспасөз мәслихатын бере алмаймыз. Егер үкім бір жерде басылып шықса, таң қалмас едім», - деп жазды.

Интернетте адвокат Шайықовтың сөздерін растайтын бейнежазбалар пайда болды. Біреу сот мұрағатын жүктеп қана қоймай, Махамбет Әбжанның қылмыстық ісін еркін қол жетімділікке жүктеу процесін жариялады.
 

8 ақпан 

exk.kz (Қазақстан)

«Экспресс К» сайты өз жұмысын жалғастырады

Басылымның бас редакторы Артем Истомин редакцияның жабылу қаупінен кейін ұжымның бір бөлігі қысқарғанын айтты. Ал қалған журналистер негізгі жұмысынан басқа әлеуметтік желіде басылымды көбірек жариялаумен айналыса бастады.
Басылымның жетекшісі Истомин: «Әлеуметтік желідегі жұмысты тоқтатпау үшін шығармашылық қызметкерлердің бір бөлігі жаңа мазмұнды жылжыту қызметіне ауысты. Бөлімді тәжірибелі журналист Андрей Зубов басқарады, ол тек қаламның шебері ғана емес, сонымен қатар әлеуметтік медианың нағыз білгірі болып шықты», - деп жазды.  Сайт қаңтар айында жақсы статистика көрсеткенін және материалдардың бірін миллионнан астам адам оқығанын атап өтті.

Редакция наурыз айында жұмысын жалғастырады.
Естеріңізге сала кетейік, өткен жылдың қараша айында БАҚ иесі ERG компаниясының медиаресурстарды иеленуден бас тартуына байланысты Қазақстанның ең көне бұқаралық ақпарат құралдарының бірі жабылуы мүмкін екендігі туралы хабарланған болатын.
 

3 ақпан

БАҚ Қостанай облысы

Қостанай облысында шенеуніктерді газет-журналға жазылуға мәжбүрледі

Қостанай облысында шенеуніктерді мерзімді басылымдарға жазылуға мәжбүрлеу жалғасуда. Бұл туралы 3 ақпанда Мемлекеттік қызмет істері департаментінің Әдеп жөніндегі кеңес отырысында мемлекеттік қызметшілер арасында жүргізілген анонимді сауалнама нәтижесінде мәлім болды.

Мемлекеттік қызмет істері департаменті Бақылау бөлімінің бас маманы Алмат Оспановтың айтуынша, 169 мемлекеттік қызметші газет-журналға мәжбүрлі түрде жазылу туралы арызданған. Жылына бір рет мәжбүрлі жазылу туралы – 31, жарты жылда бір рет жазылу туралы – 36, тоқсанына бір рет жазылу туралы – 1 факті анықталған.
 

6 Ақпан, 

БАҚ (Рудный қ., Қостанай облысы)

Рудный әкімінің м.а. тағайындауға бір ғана журналист шақырылды

6 ақпанда «Рудненские СМИ» WhatsApp-чатында журналистер қала әкімінің міндетін атқарушы тағайындалатыны туралы ақпаратты растауды сұрады. Баспасөз хатшысы Ольга Тишкимбаева басында жауап бермеді, кейін ақпарат күтіп отырғанын айтты.
Сол күні Рудныйда қала әкімінің міндетін уақытша атқарушы тағайындалды, іс-шараға тек рудныйлық Город АА тілшісі шақырылды. Тағайындау туралы облыс әкімінің баспасөз қызметі хабарлады.

Қостанай облысы әкімінің баспасөз хатшысы Жұматай Кәкімжанов «Наша Газета» бас редакторы Тимур Гафуровтың неге барлық БАҚ тағайындауға шақырылмады деген сұрағына: «Тағайындау облыс әкімінің орынбасары деңгейінде болды. Облыс әкімінің баспасөз қызметі өз бағытында жұмыс істейді. Қайда шақырса әрқашан баспасөзді алып жүреміз. Бізді ол жерге шақырған жоқ. Сонымен қатар, Рудныйда өзінің баспасөз қызметі бар. Енді біз сізді өзімізбен бірге алып жүруге тырысамыз, уәде беремін!» деді.

8 ақпан

Георгий Говоров, «Наша Газета» (Қостанай)

Әкімшіліктің саяжай тұрғындарымен кездесуіне таңдалған БАҚ өкілдеріне ғана рұқсат етілді

«Юбилейное» бау-бақша қоғамының өкілдері ақпанның 8-і күні «Наша Газетаның» тілшісі Георгий Говоровты Қостанай әкімдігінде бау-бақша қоғамымен кездесуге шақырды. Жиналыс бақылауы бар нысанда (әкімдік) өткендіктен, тілші Георгий Говоров Қостанай әкімінің баспасөз хатшысы Алмаз Әбілдиннен оған қатысу мүмкіндігін сұрады. Әбілдин: «Біз ешкімді шақырған жоқпыз, бұл жай ғана жұмыс жиналысы» деп жауап берді.

Алайда кешке бұл кездесу туралы «Костанайские новости» тілшісі Евгения Ермакова хабарлады.
Говоров тағы да Әбілдинге хабарласып, әкімдік «НГ»-ның ақпаратқа тең қол жеткізу құқығын бұзып отырғанын айтты. Баспасөз хатшысы: «Біз ешкімді шақырмадық, мен ол жерде болмадым», - деп жауап берді. Нәтижесінде Говоров келесі жолы әкімдікте мұндай кездесуге шақырусыз келетініне уәде берді.
 

3 ақпан 

inbusiness.kz (Астана қ.)

Үкімет Мәжіліс депутаттарының жалақысы мен жеңілдіктері туралы сұраққа жауап берген жоқ

inbusiness.kz: «Үкіметке инфляция, жеңілдіктер және басқа да преференциялар жағдайында депутаттарға тиесілі жалақы мөлшері, бір мандатты депутат пен партиялық тізім бойынша депутатқа төленетін ай сайынғы төлемнің айырмашылығы қандай?» - деген сұрақ жолдады.

Редакция: «Қазақстан Республикасы Президентінің 2023 жылғы 19 қаңтардағы «Жетінші шақырылған Қазақстан Республикасы Парламенті Мәжілісін тарату туралы» №104 Жарлығына сәйкес сіздің өтінішіңіз қараусыз қалдырылғанын хабарлаймыз» деген жауап алды.
Журналиске бұл жауап біртүрлі көрінді, өйткені мәжіліс аппараты жұмысын жалғастыруда.

6 ақпан

Анастасия Шерстянкина, «Ақ Жайық» (Атырау қ.)

Атырау әкімі журналиске жер учаскесін сату және абаттандыру туралы сұрақтарға жауап бермеді

20 қаңтарда «Ақ Жайық» тілшісі Атырау қаласының әкімі М.Қалауи атына Авагард-4 шағын ауданына әкімшілік-тұрмыстық ғимаратты салу және пайдалану үшін жер учаскесін сатумен байланысты сауал жолдады.
Атап айтқанда, журналист осы учаскені абаттандыруға – ағаш отырғызуға және суғару жүйесін жүргізуге, ойын алаңын салуға қанша қаражат жұмсалғанын хабарлауды сұрады. Сондай-ақ, Анастасия Шерстянкина отырғызылған ағаштар мен ойын алаңы тазартыла ма, ал сатылған жағдайда суару жүйесі бөлшектеле ме деп сұрады.
6 ақпандағы жағдай бойынша журналист жауап алған жоқ.

6 ақпан

Георгий Говоров, «Наша Газета» (Қостанай облысы)

Рудный әкімдігінің баспасөз қызметі жарты күн бойы қалада енгізілген төтенше жағдайға қатысты сұрақтарға жауап бермеді

1 ақпанда Рудныйда жылу желілеріндегі апатқа байланысты жергілікті төтенше жағдай режимі жарияланды. 6 ақпанда «Наша Газета» апталығының тілшісі Георгий Говоров сағат 09:17-де «Рудненские СМИ» WhatsApp чатында Рудный әкімінің баспасөз қызметіне төтенше жағдайға байланысты қандай шаралар өтетінін сұрады. Брифинг өткізуді сұрады. Еске салғаннан кейін, сағат 14.07-де ғана Рудный әкімінің баспасөз қызметі осы мәселе бойынша БАҚ өкілдеріне түсініктеме берді.

7 ақпан

Әлия Ахмедиева, Ratel.kz (Жетісу облысы)

АЭС құрылысына қатысты қоғамдық тыңдау туралы тек ауыл әкімдігі хабарлады

Ratel.kz тілшісі Әлия Ахмедеваның хабарлауынша, жақын арада Алматы облысы, Жамбыл ауданы, Үлкен ауылы маңында атом электр станциясын салу мәселесін талқылау керек. Ол бар болғаны 206 жазылушысы бар ресурста қоғамдық тыңдау туралы ақпаратты тапты. 28 ақпанға жоспарланған тыңдаудың өтетін орны – Үлкен ауылындағы мектептің акт залы. Хабарламаға Алматы облысы Жамбыл ауданының әкімдігі қол қойған.

Алматы облысы Жамбыл ауданы әкімдігінің баспасөз қызметі қоғамдық тыңдауға қатысты пікір білдіруден бас тартты. Олар түсініктеме алу үшін Үлкен ауылының әкімі Кенжемұрат Қасеновке хабарласуға кеңес берді.
Әкім: «Иә, тыңдау өткізу жоспарланған, ол жерде нақты не айтатынын білмеймін. Тақырып атом электр станцияларының құрылысына қатысты. Барлығын шақырамыз. Кез келген адам келіп сөйлей алады» деді.

 Журналист мұндай хабарландыруды Алматы облысы әкімдігінің, Энергетика министрлігі мен Қазатомөнеркәсіптің ресми сайттарынан таппағанын айтады.
«Шенеуніктер мен энергетиктер алыстағы ауылдық жерде заңмен белгіленген қоғамдық тыңдауды тыныш және үнсіз өткізіп, Балқаш көлі аймағында атом электр станциясын салу мәселесіне тез арада нүкте қойып, шешкен сияқты», - деп қорытындылады Ахмедиева. 
 

7 ақпан

Лұқпан АХМЕДЯРОВ, журналист (Орал)

Лұқпан Ахмедьяров өзінің Google аккаунтын бұзу әрекеті туралы хабарлады

Белгісіз біреулер оралдық журналист Лұқпан Ахмедьяровтың Google аккаунтын бұзбақ болды. Бұл туралы ол 6 ақпанда Facebook желісінде хабарлады.
Ахмедьяров: «Басталды. Бір жарым сағат бойы Google аккаунтымды бұзбақшы болды», - деп жазып, скриншотты салды.
Бұзу әрекеті бірнеше күн бойы тоқтамады.