14 қыркүйек.
Қоғам (Қазақстан)
Орталық сайлау комиссиясы облыстық маңызы бар қалалар мен аудан әкімдерінің сайлауын өткізу туралы хабарлады
14 қыркүйекте Орталық сайлау комиссиясының отырысында Орталық сайлау комиссиясының төрағасы Нұрлан Әбдіров 2023 жылғы 5 қарашада облыс қалалары мен аудан әкімдерінің пилоттық сайлауы өтетінін мәлімдеді. 17 облыстық мәслихат 45 аудан мен облыстық маңызы бар қаланың тізімін бекітті.
Кандидаттарды ұсыну сайлау тағайындалған күннен кейінгі күні басталып, сайлау күніне 30 күн қалғанда жергілікті уақыт бойынша он сегіз сағатта аяқталады. Кандидаттарды тіркеу сайлау комиссиясы барлық қажетті құжаттарды қабылдағаннан кейін басталып, сайлау күніне 25 күн қалғанда жергілікті уақыт бойынша он сегіз сағатта аяқталады.
Кандидаттардың сайлауалды үгіт-насихат жұмыстары кандидаттарды тіркеу мерзімі аяқталғаннан басталады, яғни сайлау күніне 25 күн қалғанда және дауыс беру күнінің алдындағы күні жергілікті уақыт бойынша сағат 0-де аяқталады. Сайлау науқанын өткізу Сайлау туралы Конституциялық заңмен реттеледі.
15 қыркүйек.
Телехабар тарату (Қазақстан)
Кейбір телеарналар спутниктегі ақауларға байланысты Қазақстанда қолжетімсіз болды
15 қыркүйек күні кешке Қазақстанда KazSat-3 спутнигіндегі штаттан тыс жағдайға байланысты OtauTV топтамаларындағы кейбір отандық және шетелдік телеарналар көрермендер үшін қолжетімсіз болды. KazSat-2 резервтік спутнигін пайдаланатын мемлекеттік телеарналар әдеттегідей штаттық режимде көрсетілді.
«Қазтелерадио» АҚ баспасөз қызметі «Барлық 567 радио-телевизиялық станциясы KazSat-2 резервтік спутнигінен телеарналарды қабылдап, Қазақстанның бүкіл аумағына таратты» деп хабарлады.
Кейін Цифрлық даму, инновациялар және аэроғарыш өнеркәсібі министрлігі 15 қыркүйекте Ай мен Жердің көлеңкелі аймақтарынан өту кезінде KazSat-3 байланыс ғарыш аппаратының аккумуляторлық блоктары разрядталғанын хабарлады. Бұл спутниктік хабар тарату мен деректерді беруді уақытша тоқтатуға әкелді.
«Қазір ұлттық оператор «Республикалық ғарыштық байланыс орталығы» АҚ ғарыш аппаратын жасаушы «Академик М.Ф.Решетнев атындағы АСЖ» АҚ-мен бірлесіп аталған қызметті қалпына келтіру жұмыстарын жүргізуде», - делінген ведомство хабарламасында.
16 қыркүйек күні сағат 10:11-де спутниктік телерадио хабарларын тарату қалпына келтірілді.
20 қыркүйек.
Қоғам (Қазақстан)
Қаржы министрлігі шетелдік қаражат пен мүлікті алушылардың реестрін жариялады
Қаржы министрлігінің Мемлекеттік кірістер комитеті (МКК) 2023 жылдың бірінші жартыжылдығына арналған «Шет мемлекеттерден, халықаралық және шетелдік ұйымдардан, шетелдіктерден, азаматтығы жоқ тұлғалардан жариялауға жататын ақша немесе өзге де мүлікті алған тұлғалардың реестрін» жариялады. Тізімге 240 заңды және жеке тұлға кіреді, оларда ұйымның атауы мен БСН (Бизнес сәйкестендіру нөмірі) қосымша тұлғаның толық аты-жөні және ЖСН (Жеке сәйкестендіру нөмірі) көрсетіледі.
МКК тізімнің жариялануын ҚР Салық кодексінің 29-бабының талаптарымен түсіндірді, оған сәйкес мемлекеттік кірістер комитеті өзінің интернет-ресурсында шетелдік көздерден ақша немесе өзге де мүлік алған тұлғалардың реестрін жариялайды.
Комитеттің түсініктемесінде «Бұл түзету азаматтардың мемлекетке де, үкіметтік емес ұйымдарға да сенім деңгейін арттыруға бағытталған», - делінген.
Бап оның ішінде мемлекеттік мекемелерге, мемлекеттік тұлғаларға, квазимемлекеттік сектор субъектілеріне қолданылмайды.
«Салық кодексінің 30-бабына сәйкес салық төлеушінің сәйкестендіру нөмірі туралы мәліметтер және оның атауы салық құпиясы болып табылмайды», - делінген МКК түсініктемесінде.
Әділет министрі Азамат Есқараев та өз кезегінде журналистерге жеке тұлғалардың ЖСН жариялануына қатысты пікір білдірді.
«Мемлекеттік кірістер комитетінің әрекетін бағалауға құқығым жоқ. Бір ғана білетінім, біз қолданыстағы салық заңнамасына сәйкес шет мемлекеттерден қаржы алып жатқан тұлғаларға қатысты ақпарат жинау бойынша тиісті жұмыстарды жүргізіп жатырмыз», - деді Азамат Есқараев.
