Белгісіз біреулер Динара Егеубаеваның атынан жалған ақпараттар таратуда

Журналист Динара Егеубаева өзінің аты мен фотосуретін пайдаланып, жалған ақпарат тарататын бірнеше фейк аккаунтта жазба пайда болғанын хабарлады.

Журналистің «Әділ сөз» қорына берген дерегіне сәйкес, Динараға қатысы бар делінетін бірнеше Telegram-арна бар. Егеубаева бұл арналардың өзіне тиесілі емес екенін және оларда жарияланған ақпаратқа қатысы жоқ екенін мәлімдеді.

Жалған хабарламалар өзге де платформаларда таралуда. Атап айтқанда, Threads желісінде Егеубаева саяси баспана алу мәселесімен АҚШ елшілігіне жүгінді деген ақпарат жарияланған. Журналист бұл мәліметтің жалған екенін айтып, АҚШ елшілігін алдын ала хабардар еткен.

Егеубаеваның айтуынша, сол аккаунт оның халықаралық «Шекарасыз тілшілер» ұйымынан грант алғаны туралы да ақпарат таратқан.

Журналист «Әділ сөз» ұйымына: «Бұл мен туралы жалған ақпарат таратуға машықтанған арна. Мен АҚШ елшілігін алдын ала хабардар еттім. Сіздерге де ескертіп қойғым келді, өйткені соңғы жазбада мен «Шекарасыз тілшілер» ұйымынан грант алды деген ақпарат таратып отыр», - деді.

Қорға ұсынылған скриншоттарда Егеубаеваның аты мен фотосуретін пайдаланылған фейк парақшада сексуалдық сипаттағы контент орналастырылған.

 «Әділ сөз» сөз бостандығын қорғау халықаралық қоры журналистің атынан жалған аккаунттар ашуды, жалған ақпарат таратуды және оның бейнесін сексуалдық сипаттағы контексте пайдалануды цифрлық қысым мен беделін түсірудің елеулі түрі деп бағалайды.

«Әділ сөз» ұйымы мұндай ресурстарды құрып, басқарып отырған адамдарды анықтап, қылмыстық жауапкершілікке тарту керек, дейді.